Coghito Eden.......

Power Ride 2 – Seremban – Kota Bharu – Seremban

Dah lamo eden bercadang untuk re-trace balik route Power Ride 1 dulu. Tapi keadaan sekarang ni tak mengizinkan. Tak bokosompatan botow nak ride. Tapi, lopeh bokigho-kigho dapek gak set satu trip.

Tapi, kali ni agak lain sket. Target masih ride terus-menerus pergi balik, cumo ahlil ride tu mutu-mutu tak do gear…….skuter la tu. Coghito punyo coghito, adolah limo oghang yang gilo….muahahaha…..sobab sanggup buek kojo gilo, ride ko Kota Bharu balik aghi!

Tompi, eden tak dapek naik skuter sobab skuter eden tu dah uzur bona. Eden bawaklah si Pisau eden tu. Pisau tu pun tak boghapo sihat, jadi poie bawak jumpo doctor eh dulu. Ghabak poket eden di buek eh.

25/05/2013

05:00am

Hari yang ditunggu-tunggu. Eden dan Gepren eden lewat sket. Kol 5:00am baghu nak start mutu. Dalam sojuk-sojuk pagi tu, pecut ko R&R Seremban. Sampai sinun, Roling, Bobe dan Shah dah tunggu.

Terus shoot ko KL. Dah set RV dongan Bob Panjang dan Erie kek Petronas Jusco MRR2.

Popagi ride memang besh. Laju yo. Eden perati meta Pisau Biru eden togak yo. Makno eh, 120km/j la tu. Keto pun tak banyak. Yolah, popagi buto hari Sabtu memang kughang lah keto.

06:00am – Petronas Jusco MRR2

Sampai kek RV point, Bob dan Erie dah ado. Tapi momulo yo, doghang bukak coghito pasal hampir kono pau kek Polis. Siap kono geledah lagi skuter dioghang. Abih, si Erie tu ghoman eh ngalah an Ramli Sarip maso bangun tido…… muahahahaha…… ampunkan kami wahai penunggu gua!

Lopeh isik minyak, zasssss…..tak bleh tunggu sobab waktu dah tokih bona. Kok lambek mulo kang, lambek plak lah sampai eh. 6:20am, tayar golek. Kopalo Ketapi, Bob Panjang sobab ni jalan dio balik kampong.

Suhu dingin, keto tak banyak, jadi…. layan. Besh botow. Sampai kek Janda Baik, kabuh toba. Pergh cam gi obersea plak ghaso eh. Tompi tak do lah sojuk bona. Kok kek Eropah tu, 0 darjah Celcius wooo.. leh boku. Ni sotakat mongolatuk yo la kok bukak baju, tak boku doh.

07:00am Petronas Bentong

Sampai Bentong dah pukul 7:00am. Boghonti kojap sobab ado plak yang nak koncing. Sambil tu ghunding kek mano nak sarapan. Sumo eh sotuju kek area Kuala Lipis.

Lopeh Bentong jalan lughuih. Apo laie, toghobang lah somasing. Totibo…… ado bondo boguling-guling ateh jalan. Eden pueh lah mongagak, nak ngelak kighi ko nak ngelak kanan. Nasib baik dapek gak la elak.

Tak lamo lopeh tu, sumo eh boghonti. Ghupo eh, back rest si Erie yang tocicir….. muahahaha…… Bob Panjang patah balik cubo caghik back rest tu. Kek topi jalan tu sibuk ngojo an bakul skuter Erie yang dah longgar sobab skru dah hilang. Sib baik ado satu skru, sobolah laie ikek dongan cable tie yo. Buleh lah tu somontagho nak jumpo kodai mutu.

Bob Panjang sampai balik kek tompek kami boghonti. Dio koba tak jumpo back rest tu. Mungkin dah topolanting dilangar eh dek keto atau lori.

Sopanjang jalan memang tak do masalah. Asal ado keto yo……potong….ado keto yo….. potong. Yang masalah eh, tak boghonti-boghonti. Eden bolun minam daghi pagi. Bokoghoncong poghut. Banyak kali gak kopalo ketapi bongonoti tompi momanjang tak jadi.

09:00am Petronas Felda Kechau

Sampai Petronas Felda Kechau, baghulah boghonti. Tu pun sobab kudo bosi dah haus. Kang kok tak boghonti, ado plak yang balik kaki bosa sobolah kek monolak mutu. Tolanjur dah boghonti tu, sosah lah apo yang ado.

Kek situ ado gerai, tompi macam kureng sket. Jadi ahli majlis Power Ride tak bosotuju untuk singgah. Tapi lopeh dapek ghuti krim dan air mineral, logo gak ghaso eh. Toghang sket bijik mato.

Kalau ikut an, dari Petronas tu ko gua Musang dah tak jauh. Tapi eden dah mulo boring dan ngantuk. Matohaghi plak dah mulo tinggi. Eden kalau lapar, bodan copek masuk reserve mode. Dio mulo ngantuk dan tak leh konsenteret. Tu yang hampir tobabas kek solokoh tu. Sib baik sompek kawal si Pisau Biru eden tuh. Aduiiiyaiiiii…. Comeh! Si Bobe siap bagi konfem signal, samado eden okay ko tidak.

10:40am R&R Gua Musang

Tak lamo lopeh tu, sampai ko R&R Gua Musang. Ini R&R fesyen baghu. Ado food court yang bosar dan soleso.

Si Bob Panjng laju yo bolasah lempeng moden. Lopeh tu orda mee kari plak. Gilo, badan slim tompi solegho…. Fuuuuu somangat! Eden cari nasik berlauk dan kopi mahkota dewa. Beshhh…… Gepren eden orda Laksa Penang. Yang lain pun tak kughang gak. Dah ompek jam ride woooo….. poghut dah main lagu keroncong ghontak rock kapak!

Lobih kughang 11:45am, mulo ride halo ko Kuala Krai. Kereta dah mula banyak. Tapi sebijik domi sobijik kono kitai dek Sym 200. Pawaaaaa….. Eden follow yo la mano yang bulih. Si Pisau Biru dah masuk umur veteran, tak bleh nak bolagak mudo. Kang pancit……sumo oghang susah.

Tapi, masalah paling bosa………. Paneh! Matohaghi topacak ateh kopalo, aduiiiii….. boghapi ghaso eh!

01:20pm Petronas Guchil Jaya, Kuala Krai

Sampai Kuala Krai dah pukul 1:20pm. Berhenti di Petronas Taman Guchil Jaya. Paneh jangan coghito la….. Lopeh bogi kudo bosi minam, tuan eh plak minam sambil lepak kek gerai kosong. Sotakat ni Sym 200 memang cemerlang. Tak do sapo yang ngadu loss power atau overheat. Tompi yang heran eh tu, rider eh pun masih sogar. Pergh… jeles botow kek oghang mudo-mudo ni. Banyak tonago…..

Eden…..ehmmm… ride boghojam-ghojam tongah paneh…… dah mulo ghaso ponek. Kok dapek banta sokolap….besh ni.. Tompi mano ado bawak banta…… muahahaha…. soba yo lah!

03:00pm Kota Bharu

Hampir 3:00pm, sampai area Kota Bharu. Perjalanan dalam bandar lobih sekso. Keto banyak, paneh dan trafik lait eh lamo bona. Bopoluh-poluh di buek eh. Tapi, sampai gak ke gerai Nasik Ulam Cikgu.

Sampai yo situ….aduiiii… ponuh oghang. Bilo dah dapek duduk, Bob Panjang poie ambik air duo jag, satu air sirap dan satu lai air sirap bandung. Tak sampai 2 minit, koghing!

Ingat an lopeh tu ko dapek nasik boghulam potai dongan cencaluk…. Tak do, dah abih. Lauk eh sumo dah abih. Muahahaha….. tu sobab kodai mamak poplar. Ghuti eh tak ponah abih, teh tarik eh tak ponah abih, mee goring eh tak ponah abih, nasik goring eh pun tak ponah abih….. dah lah cam tu. Soghang pun tak do waiter atau waitress yang datang monogur…… kocik ati botow!

Cam biaso lah. Kito ni soda dighi. Kok oghang tak ondak, kitoghang pun tak hingin! Blaahhhhh…………muahahahahaaaa……

Tak jauh daghi situ ado plak kodai nasi kukus. Namo eh…ontah… poghut dah lapa bona maso tu…. Namo eh pun eden tak nampak. Kodai topi jalan, kocik yo tapi oghang ghamai gak. Bilo dah duduk, apo laie, pokono nasik kukus dongan ayam goring dan air lychee kang. Lopeh tu tambah plak dongan air tombikai. Nasik eh sodap, air eh pun besh tompi mang aaiii…. manih botow! Kek Kota Bharu ni gulo mughah gak eh laaa. Laie pun makan eden dan gepren tak ampai pun RM20…nasik kukus, lychee kang dan air tombikai x 2…..

04:30pm Masjid Al Muhammadi

Lopeh makan tros poie masjid. Maso tu dah dokek waktu Asar. Eden sompek mandi sket walaupun tak bawak towel. Lopeh mandi, kono gogar-gogar badan sket kasik air tu jatuh, lopeh tu baghu pakai baju. Maso oghang Jemaah Asar eden solat Jamak dan Qasar yo. Kito musafir, ado hadiah Allah SAW bagi. Kono toghimo, kok tak kang kocik ati Dio!

Sobolun botolak balik, sompek bughak dongan soghang brader pakai Gpang. Dio koba, ado oghang offer RM7k Gpang dio tu tompi dio tolak. Nak bogi kek anak, keteh! Kok anak eh tu kaki mutu dan minat klasik centu lah kan. Kok tak baik bogi kek eden yo. Nambah koleksi mutu eden kek umah. Kok kasi sarbis, dan clear ekzos, tak hal nak ride bawak balik SonangWang tuh……

05:15pm tayar golek untuk bertolak balik. Jalan nak koluar dari Kota Bharu memang jem. Ponek ngelak-kighi ngelak kanan. Walau dah potang masih paneh woooo. Tompi bilo jalan clear yo, somasing boghantu. Sumo eh full throttle gek eh. Tak tokojar Pisau Biru eden. Tau-tau dah samapi Kuala Krai. Kono isik minyak dulu. Maso tuh dah kol 07:15pm.

Dari sini, lagi lah gilo. Moncanaaaakkkkk yo somasing. Kopalo eh si Bobe Al-Hurairah. Dio leh lah lajuuu… lampu cam lampu kapa toghobang.

Habih sumo keto, lori dan MPV kono pancung. Yang molawan ado 2 bijik yo, Wira dan Grand Livina. Yang lain angkek muko pun tak berani…… muahahahahaaaa….

Keadaan jalan tak boghapo sosuai lah untuk jalan malam. Kobanyakan kawasan tak do lampu dan garisan pun tak ado. Cumo lampu kapa toghonang yo yang bulih nyuloh an dongan cukup toghang.

Mulo-mulo nak makan kek Gua Musang, lopeh tu semasing sotuju plak nak makan kek Ulu Bernam. Hu manga i… jauh tu wei…. Tu yang somasing laju tu gak eh. Nak koja nasik.

Dari Gua Musang tros masuk simpang ko Cameron Highland. Peringkat awal jalan ni, pergh…. kocik dan banyak yang tak elok. Kek dopan sket baghu okay. Sokali laie, somasing gilo throttle. Moncanak yo deh….cicir eden kek bolakang. Maso tu bulan mongambang plak tu. Eden takut kang kok ado plak yang toghuih kombang sayap jadi kolawar. Gepren eden plak bokali-kali soh eden laju biar dokek sket kek yang lain. Sogham teh dio!

Kojap yo dah sampai area Cameron Highland. Kek situ baghu lah mulo polahan sket…gigil beb…sojuk. Kek sokoliling banyak nampak kobun sayur yang toghang bondoghang. Dongar koba eh, kalau pasang lampu waktu malam, sayur dan bungo-bungo akan copek bosa.

Dopan sket dari Kampong Raja, totibo kono simbah kek air. Tokojut somasing. Ado paip pocah kek topi jalan. Air momancut cam paip bomba daaa……

Tak jauh daghi situ baghulah konvoi boghonti kek topi jalan. Maso tu dah kol 11.00pm. Si Erie tolobih air, poie dibuang eh kek topi bukit. Eden ghisau gak, takut kono togur dek Minah Kampung Raja. Tapi, bilo tengok balik, ehmmmmm… jangankan Minah, Penunggu Guo pun takkan boghani….. muahahahaha….ampun kan kami Penunggu Gueeee……

Lopeh bughak-bughak sambil rehat an punggung yang dah kobeh, konvoi pun mulo lah start enjin nak goghak. Kek sinilah bomulo eh adventure baghu…………

Tak sampai boghapo menet yo ride…. Ujan tughun. Toghuih lobek yo. Nak pakai baju ujan, takut nak boghonti sobab golap dan jalan sompit sobab kek kighi kanan ado guardrail.

Sib baik tonampak Bob Panjang sodang pakai baju ujan. Eden pun boghonti. Somontagho nak solosai pakai baju ujan….bodan dah kuyup dah. Maso yang samo Roling, Erie, Shah dan Bobe boghonti kek kodai bungo. Ontah apo dibuek eh kek kodai bungo malam-malam buto!

Gilo, ujan lobek botow. Tak nampak jalan langsung. Sib baik ado reflector kek line tongah. Tu lah yang jadi panduan. Dalam ujan lobek tu topakso ghodah ujan, air ateh jalan dan cuaca yang sojuk. Kengkadang ado gak topakso ghodah lumpur yang bocampur dongan air tu. Sogham woooo… Eden ghaso oghang bawak keto pun cuak nak drive dalam koadaan tu.

Tak lamo lopeh tu, geng bungo potong eden. Laju yo poie eh. Hu mang aiiii… dalam ujan pun layan gak. Dasar Mat Motor….. tak bulih lah duduk bolakang hendal… tak soda dighi la deh…..

Lamo botow ghaso eh turun Cameron kali ni. Hati plak bodotab-dotub, ghisau dongan ujan lobek dan air bosepah ateh jalan. Sib baik tak ado pokok tumbang atau tanah ghuntoh. Dalam sojuk tu, poluh dingin totap kuar.

Geng Bungo boghonti kek main road sobolun masuk tol. Tros jalan sampai kawasan rehat Simpang Pulai. Kek situ jumpo laie geng rider yang lain yang turut berhenti ‘rehat’ dari hujan lobek. Tak tau dioghang nak poie mano, tompi sumo eh basah kuyup!

Lopeh rehat kojap, dan bincang kek mano nak isi poghut (Bob Panjang dah sosah Maggie dah kek Petronas tu) konvoi goghak laie. Tak do capo pun mongagak…..lobih banyak cabaran sodang monanti. Bagi eden, mulia saat tu, adventure eden sengsoghang yo (dongan Blade dan Gepren eden la..)……

Yang lain dah bodosup kodopan. Eden start enjin Blade….. ghaso lain macam yo. Bilo eden tarik throttle, macam boghek yo. Eden suspek satu piston tak idup. Bilo masuk gear dan mulo jalan….. memang sah. Tak da power langsung. Sobab, baghu ghodah ujan, dalam ati eden koba…. Ala… basah ni, jap lagi okay lah tu.

Tapi tak okay-okay. Eden jalan gak, polahan yo, sokitar 60km/h. Mato dah ghabun, meta tak nampak kalau momalam. Kobanyakan maso eden jalan dalam gear ompek yo. Kalau masuk gear limo atau onam, tosongguk-songguk.

Kengkadang eden boghonti, cubo nak botow an kalau bulih. Tapi mutu blade ni kalau dalam golap, ghonti an lah. Kebel plug pun tak nampak. Yang buek an eden tambah ghisau, bilo boghonti yo, air moncughek dari radiator. Boghasap laie. Dalam ati eden, ontah sampai manolah enjin Blade ni boleh botahan. Kalau dio mati toghuih, tido topi heway lah eden.

Rider lain dah ilang kek dopan. Eden tak do pilihan, jalan yo lah pelan-pelan. Hujan makin lobek plak tu….aduiiii………(mereka pun ada coghito tosondighi….kang eden coghito!)

Dalam polahan tu, mato eden pulak mulo ngantuk. Comacam eden tobayang ateh jalan tu. Kengkadang cam ado nampak tunggo kayu pun ado. Gepren eden plak heboh ponek. Apo tak eh…. Pukol 2 pagi, dalam ujan lobek dongan muto yang tak somonggah………. Tension woooo! Last-last eden koba kek dio, kito kua kek Slim River.

Sampai tol Slim River eden kuar. Cadang an eh nak carik hotel. Bulih lepak situ sampai pagi. Tapi, memang nak buek coghito ni lobih panjang, sumo hotel kek Slim River ponoh tomasuk Rumah Rehat Kerajaan. Hujan masih yo lobek, basah kuyup, sojuk plak tuh. Tak do pilihan, toghuih an ride ko Tanjung Malim.

Jalan dari Slim River ko Tanjung Malim ni sogham sket kalau momalam. Banyak lalu kawasan tak do penduduk. Dahlah golap, ujan plak, enjin Blade plak macam nak mampuih yo. Punyolah comeh…… tompi sampai gak ke kawasan deghet kodai.

Totibo Nampak hotel. Toghuih U-turn dan singgah. Bilik ado….yesss… logo. Badan dah ponek botow maso tu. Check in dan lopeh tu sms Roling ngato an eden bomalam kek Tanjung Malim. Maso tu bateri phone eden dah meghah. Ghaso eh dah tak bulih buek call dah.

Sogalo eh basah tomasuk yang dalam beg. Bilo dapek mandi air paneh dan towel koghing, perghhh…. best….. lolap sampai pagi……..

Maso eden bogasak dongan Blade dalam ujan sopanjang jalan dari Simpang Pulai ko Tanjung Malim, rider lain pun boghasak samo. Lopeh hentian Simpang Pulai, scooter Elegan si Erie buek hal. Tak boleh laju. Boleh jalan dalam 30km/j yo. Bilo puleh throttle lebih sikit, enjin eh semput.

Rider lain, ado yang jalan dulu dan tunggu kek Ulu Bernam dan ado yang escort Erie sampai ko Ulu Bernam.

Dioghang sumo sampai ke Ulu Bernam dalm 3.30am, lobih kughang maso yang samo dongan waktu eden koluar di toll Slim River. Makno eh, kalau eden toghuih ride pado kolajuan 60km/j, eden ghaso bulih jumpo dioghang sobolun R&R tu laie.

Maso eden check in kek hotel Tanjung Malim sokitar 4.30am, dioghang masih kek Ulu Bernam.

Tapi maso dioghang bertolak balik ko KL, Elegan tu pulih. Sumo eh sampai kek Toll Jalan Duta sobolun melewati 24 jam dari waktu bertolak.

Makno eh, 5 riders (Aprilia, Elegan dan 3 Sym) berjayo buek pojalanan poei dan balik Kuala Lumpur - Kota Bharu dalamaso kurang dari 24 jam.

 
TAHNIAH kepada S2 Riders!

Tosoda pagi esok eh dah pukul somilan lobih. Tros bosiap untuk sambung pojalanan yang bolun solosai. Tapi sobolun tuh, gosok baju dulu. Kasik koghing. Sib baik kek hotel tu ado sterika.

Tompi sobolun botolak, makan dulu kek restoran tak jauh dari hotel tu. Siap pinjam charger kali, charge BB eden. Sobab, malam sobolun tu tak makan, poghut lapar botow. Sosah nasik dongan 2 koping roti canai…… pergh…..

Haghi paneh gilo, tapi Blade lagi paneh. Piston masih sobolah yo nyalo. Mulo-mulo eh eden pun tak pasti, nak ride atau balik naik bas yo. Tompi Blade camano? Bilo ngonang an, kek SonangWang pun susah nak cari part Blade tu, kek Tanjung Malim ni lagilah susah. Maun kono koghek lapan boleh eden kan.

Eden buek koputusan, ride yo lah pelan-pelan. Sampai mano yang bulih. Kalau bungkam enjin eh kang, baghu panggey lori.

Sobolun masuk heway, isik minyak kek Tanjung Malim.Kek heway, maintain sokitar 60-70km/j. Dok kek emergency lane yo lah. Kojo gilo botow. Tapi, yag heran eh, walaupun satu piston yo yang idup, pojalanan smooth dan temperature tak berapa tinggi. Kadang-kadang naik ¾, lopeh tu turun balik ko sotongah. Naik…turun…naik…turun…..macam yoyo daaaaa…..

Beberapa kali gak berhenti, boring dan ngantuk sobab polahan bona. Sampai laybay Sg Buloh boghonti laie. Bilo eden tughun, tengok ekzos boghasap, silencer warna meghah dan ado kosan oksidasi warna putih. Pergh….gilo…..sticker kek silencer tu pun dah hanguih. Tapi bilo eden tengok coolant level, normal. Bilo enjin dah sojuk, eden bukak tutup radiator, level air pun normal…… aduiii… heran….

Teori eden…..satu piston tak bakar, jadi gas petrol yang tak bakar tu masuk dalam ekzos. Sobab ekzos to paneh, gas to tobakar dalam ekzos… jadi cam after burner jet pojunag laa…… tu yang buek ekzos eden meghah tu. Kok jalan malam musti cam mutu Ghost Rider…… muahahahahaha……………….

Lopeh basah an tokak, ride balik. Ado dalam 150km laie nak sampai umah. Solang 2-3km dari laybay tu….totibo….vrooommmmmmmm…..duo-duo piston idup. Eden kasih test sket….. pergh….. power restored. Zasssssss………..

Sampai KL eden tros masuk Elite. Maintain speed sokitar 100-110km/h. Ghisau gak sobab Optimus Prime ponah kato, there is a calm between the tide…….. Takut kang kok ghudom toghuih enjin Blade eden tuh.

Haghi paneh botow tapi sojuk sket dek mutu yang dah macam okay. Hati pun sonang sket. Sampai R&R Soghomban, eden boghonti jap, basuh muko. Ngantuk wei….Tapi sobolun sampai SonangWang, ujan laie…. Tapi tak lah lobek.

Eden sampai umah kol 4.45pm. Logooo…. Enjin Blade Nampak cam okay. Tapi, yang lobih ponting, dah sampai umah. Pojalanan sokitar 1100km. Walaupun lewat, tapi sampai juga.

Yang lain, mungkin dah lamo rehat…………..

Lopeh ni, nak poie mano laie………………….